Joël Matip kominn í sumarfrí

Það er alltaf gott að komast í sumarfrí en það er fullsnemmt í febrúar. Joël Matip er sem sagt kominn í sumarfrí og það kemur ekki til af góðu. 



Joël er búinn að meiðast aftur og aftur á þessu keppnistímabili en hefur spilað frábærlega þegar hann hefur verðið leikfær.  Joël hóf leikinn á móti Tottenham í síðustu viku en fór út af í leikhléi. Hann var að sjálfsögðu meiddur og í kvöld var staðfest að hann gæti ekki spilað meira á leiktíðinni. Liðbönd í ökkla eru illa farin og nú verður farið í að koma öllu í almennilegt lag.  Joël er búinn að meiðast hvað eftir annað síðan hann kom til Liverpool. Hann spilaði 12 leiki á leiktíðinni. 

Liverpool hóf keppnistímabilið með þá Virgil van Dijk, Joe Gomez og  Joël Matip sem aðalmiðverði. Dejan Lovren var seldur og treyst á að þeir þrír, sem fyrr eru nefndir, myndu haldast heilir. Þeir hafa á hinn bóginn allir heltst úr lestinni og óheppnin alveg með eindæmum. 

Í daga hafa tveir miðverðir gengið til liðs við Liverpool. Ekki mun af veita!