Alisson frá í 10-14 daga

Alisson Becker missti af leiknum gegn Ajax í kvöld og missir líka af deildarleiknum gegn Wolves á sunnudaginn. Fjarvera hans alls getur orðið 10-14 dagar.

Jürgen Klopp sagði fyrir leikinn gegn Ajax í dag að hann hafi byrjað að stífna aftan í læri þegar 20-30 mínútur voru eftir af leiknum gegn Brighton. Við myndatöku sást væg tognun.

"Við vitum ekki nákvæmlega hvað hann verður lengi frá, en ég hef aldrei heyrt um að það taki 4-5 daga að jafna sig af svona meiðslum. Mér finnst því 10-14 dagar líklegir," sagði Klopp í dag.