| Sf. Gutt

Mohamed Salah brýtur blað


Mohamed Salah braut blað í sögu Liverpool í gær þegar hann skoraði fyrsta markið í leik Liverpool og Leeds United. Þar með varð hann fyrsti leikmaður í sögu Liverpool til að skora í fyrstu umferð deildarinnar fjögur keppnistímabil í röð!


Mohamed skoraði í sínum fyrsta leik með Liverpool á leiktíðinni 2017/18 þegar Liverpool gerði 3:3 jafntefli við Watford. Í fyrstu umferð á næsta keppnitímabili 2018/19 skoraði Mohamed í 4:0 heimasigri á West Ham United. 



Á síðustu leiktíð byrjaði Mohamed líka vel og skoraði í 4:1 sigri Liverpool á Norwich City á Anfield. Í gær gerði hann svo gott betur með því að skora þrennu í 4:3 sigri Liverpool á Leeds. Egyptinn er þar með búinn að skora í fyrstu umferð deildarinnar fjögur keppnistímabil í röð. Nýtt félagset! Ekki fyrsta metið sem Mohamed setur á ferli sínum hjá Liverpool og örugglega ekki það síðasta!

Reyndar setti Mohamed annað met í leiknum. Liverpool hefur nú unnið síðustu 35 deildarleiki í röð sem Mohamed hefur skorað í. Wayne Rooney átti gamla metið sem var 34 leikir. Hann setti það á meðan hann spilaði með Manchester United. 


Með því að skora þrennu gegn Leeds varð Mohamed Salah fyrsti leikmaður Liverpool frá 1988 til að skora þrjú mörk í fyrstu umferð deildarinnar. John Aldridge afrekaði það síðast í ágúst 1988 þegar hann skoraði öll mörk Liverpool í 0:3 útisigri á Charlton Athletic.

Mohamed kann sérstaklega vel við sig á Anfield. Þrennan kom honum upp í 52 mörk í 63 deildarleikjum á heimavelli. Magnaður árangur!

Mohamed hefur líka skorað manna mest í deildinni frá því hann lék sinn fyrsta deildarleik fyrir Liverpool í ágúst 2017. Hann hefur á þeim tíma skorað 76 mörk. Harry Kane framherji Tottenham kemur næstur honum með 65 mörk. Jamie Vardy sóknarmaður Leicester er þriðji með 63 mörk.

Sadio Mané kemur næstur Mohamed af félögum hans í Liverpool. Senegalinn hefur skorað 50 mörk á þessum tíma. Hann er sjöundi á heildarlistanum.

TIL BAKA
Nýlegar fréttir
Fleiri fréttir
Fréttageymslan