Leikið á Merseyside

Í dag var tilkynnt að Liverpool getur spilað heimaleiki sína, sem eftir eru á tímabilinu, á Anfield. Þá mun nágrannaslagurinn fara fram á heimavelli Everton, Goodison Park.

Félagið birti áðan tilkynningu á vefsíðunni að það fagnar ákvörðun þartilgerðra yfirvalda að heimila leiki á Merseyside fyrir luktum dyrum. En eins og áður hefur komið fram var ekki víst að leikurinn við Everton færi fram í Liverpool borg. Nú hefur semsagt verið gefið grænt ljós á það og verður fyrsti leikur okkar manna semsagt sunnudaginn 21. júní kl. 18:00 á Goodison Park. Þetta þýðir einnig það að heimaleikir við Crystal Palace, Aston Villa, Burnley og Chelsea fara fram á Anfield en að sjálfsögðu verða engir áhorfendur til staðar.

Enn er þó óvíst hvort að útileikurinn við Manchester City, sem á að fara fram þann 2. júlí verði á Etihad leikvanginum í Manchester, einnig er möguleiki á því að lokaleikur tímabilsins, úti gegn Newcastle, verði ekki á St. James' Park.