Af hverju er Trent ennþá númer 66?

Það er alvanalegt að þeir sem koma upp úr akademíunni fá há númer til að byrja með en svo lækka þau. Það hefur ekki gert hjá Trent Alexander-Arnold, sem hefur verið með númerið 66 á bakinu frá því að hann fékk sínu fyrsta númerið úthlutað. Ástæðuna er líklega að leita í þeirri hógværð sem einkennt hefur þennan unga og frábæra leikmann. Í það minnsta er engin persónuleg ástæða fyrir því af hans hálfu.

Lee Radcliffe búningastjóri Liverpool var sá sem úthlutaði honum númerinu fyrst. Hefðin er að þegar menn koma úr akademíunni og byrja að æfa á Melwood fá þeir háum númerum úthlutað. Í því felast skilaboð um að þó að maður hafi komist á Melwood er enn langur vegur í að komast í aðalliðið. „Þetta var númer sem var laust og hann fékk það,“ segir Radcliffe. 

Hann átti hins vegar ekki von á að sjá Trent vinna titla með þetta númer á bakinu.

„Það er skrítið að sjá svona hátt númer á þessum stað, og að viðkomandi leikmaður sé bara sáttur við það. Trent hefur bara verið ánægður með að vera í liðinu og virðist ekki gera sér grein fyrir því sjálfur hversu góður hann er. Hann biður aldrei um neitt.“

Og það er stóra ástæðan fyrir því að hann er ennþá með þetta númer. Þeir sem vinna sér fast sæti í liðinu með þetta hátt númer biðja vanalega um að fá eitthvað lægra. „Slík beiðni kemur vanalega eftir um það bil ár í liðinu. Ég hef lengi hugsað að það muni nú ekki líða á löngu þangað til hann fær lægra númer. Við höfum geymt að senda pöntunina fyrir æfinga- og keppnisbúninga fram á síðustu stundu af því að við búumst alltaf við þessari beiðni. En hún hefur aldrei komið.“

Radcliffe segir treyjuna standa stuðningsmönnum býsna nærri og því gæti mögulega verið erfiðara að skipta núna. Það verður að koma í ljós hvort af því verður.