Milner líklega klár fyrir Norwich

James Milner sneri aftur á æfingasvæðið á Melwood í gær eftir að hafa átt í meiðslum. Hann fór út af tognaður aftan í læri eftir tíu mínútur í 1-0 sigrinum á Everton í enska bikarnum 5. janúar og hefur endurhæfingin tekið heldur lengri tíma en vonast hafði verið til í upphafi.

Sadio Mané tók einnig þátt í sinni fyrstu æfingu í gær með hópnum eftir meiðslin sem hann varð fyrir gegn Wolves en eins og fram kom hér á síðunni í gær hafði hann sjálfur æft á Melwood meðan flestir aðrir tóku sér frí.

Staðan er því núna sú að allir í aðalliðshópnum eru heilir, að bakverðinum Nathaniel Clyne frátöldum en hann sleit krossbönd á hné á undirbúningstímabilinu.