Næsti leikur er alltaf sá mikilvægasti!

Það vantar ekki að fjölmiðlamenn gera mikið úr leik Liverpool og Manchester United á morgun. Jürgen Klopp segir að næsti leikur Liverpool sé alltaf sá mikilvæagasti sama hver mótherjinn sé. 

,,Næsti leikur er alltaf sá mikilvægasti svo við undirbúum okkur alveg eins. Við vitum hversu leikurinn er mikilvægur fyrir stuðningsmenn okkar. Ég vona að fólk skilji þetta. Það er sama upp á teningnum þegar við spilum við Everton. Það er aðeins meira í húfi. En við spilum alla leiki fyrir stuðningsmennina okkar ekki bara þessa. Við eigum fleiri náttúrulega óvini en önnur lið. Kannski er það út af sögu félagsins eða hversu sigursælt félagið hefur verið. Við sögðum fyrir löngu og ég sagði fyrir löngu að við þurfum að skrifa okkar eigin sögu!"


Núvernandi leikmenn Liverpool hafa tekið áskorun Jürgen Klopp og bætt sínu við sögu félagsins. Liverpool vann jú þrjá titla á síðasta ári! Það eru fleiri titlar í boði á þessu nýja ári og vonandi nær Liverpool að taka skref í átt að einum í viðbót á morgun!