Komnir heim til Liverpool

Æfingaferðin til Marbella tókst vel. Nú eru allir komnir heim til Liverpool þar sem lokaundirbúningurinn fyrir úrslitaleikinn í Meistaradeildinni fer fram. 

Allir leikmenn Liverpool eru leikfærir utan við Naby Keita. Roberto Firmino er allur að koma til og ætti að vera leikfær á laugardaginn. 

Liverpool spilaði æfingaleik við varalið Benfica á laugardaginn áður en haldið var heim til Englands. Leikið var fyrir luktum dyrum en hermt er að Liverpool hafi unnið 3:0. 

Í morgun var blaðamannafundur á Melwood þar sem Jürgen Klopp, Joël Matip og Georginio Wijnaldum sátu fyrir svörum. Næstu daga verður æft áður en liðshópurinn og föruneyti heldur til Madrídar.