Alexander-Arnold teflir við heimsmeistarann

TAA mun ganga undir viðurnefninu Grandmaster of Melwood, eða stórmeistarinn af Melwood, og þykir nokkuð sleipur í skákinni. Það mun þó líklega hrökkva skammt að vera bestur á Melwood þegar norski undramaðurinn Magnus Carlsen er annars vegar. Carlsen hefur verið heimsmeistari samfleytt í 8 ár og er einn besti skákmaður sögunnar. TAA segist vera fullkomlega meðvitaður um að möguleikar hans á sigri séu litlir, en vonast þó til að koma á óvart. 

,,Þegar ég fékk þetta boð sagði ég umsvifalaust já. Ég hef teflt frá því ég var lítill og reyni að tefla þegar ég get, þótt fótboltinn sé númer eitt, tvö og þrjú. Ég tefli mikið við Ben Woodburn. Þótt hann sé í Sheffield núna hittumst við oft og teflum."

,,Skákin er að mörgu leyti svipuð fótboltanum, þú þarft að sýna kænsku, útsjónarsemi og dugnað. Vita hvenær er við hæfi að sækja og hvenær er skynsamlegra að verjast."