Joel Matip kominn í sumarfrí

Allt útlit er á því að Joel Matip sé kominn í sumarfrí. Hann er meiddur á læri og þarf trúlega að fara í aðgerð. Þetta kom í ljós eftir leik Liverpool í London við Crystal Palace um helgina.

Joel fann fyrir einhverjum eymslum eftir leikinn en ekki var talið að neitt alvaarlegt væri á ferðinni. En nú er komið í ljós að svo er. 

Ekki er um auðugan garð að grisja hvað miðverði varðar hjá Liverpool. Ragnar Klavan og Joe Gomez eru meiddir og það sama má segja um Emre Can sem gæti hugsanlega spilað stöðu miðvarðar. Virgil van Dijk og Dejan Lovren eru því einu miðverðir Liverpool sem eru heilir í bili. Það ætti því ekki að þurfa að hugsa mikið um hvaða leikmenn standa í miðju varnar Liverpool annað kvöld í Meistaradeildarleiknum á móti Manchester City.