Jon Flanagan aftur í aðgerð!

Þær slæmu fréttir bárust um daginn að Jon Flanagan þyrfti að fara aftur í aðgerð. Þessi efnilegi strákur hefur ekkert spilað á leiktíðinni en hann varð fyrir hnémeiðslum á undirbúningstímabilinu fyrir þessa leiktíð.

Í mars var talið að hann væri að verða tilbúinn til leiks og hann spilaði hluta af stjörnuleiknum á Anfield sem þeir Steven Gerrard og Jamie Carragher völdu lið í. Það var búist við honum aftur í aðalliðshópinn með viðkomu í varaliðsleik en þá kom í ljós að Jon var ekki orðinn góður af meiðslunum og ákveðið var að senda hann í aðgerð á nýjan leik. Búist er við að hann verði ekki tilbúinn til leiks fyrr en í lok árins.

Þetta er mikið áfall fyrir Jon Flanagan og Liverpool en hann var frábær á síðustu leiktíð og lék stórt hlutverk í titiláhlaupinu eftirminnilega. Hann lék meira að segja sinn fyrsta landsleik í lok leiktíðarinnar. Nú er að vona að Jon nái sér almennilega og komist aftur til heilsu.