Nígeríska landsliðið vill fá Ibe

Jordon Ibe hefur spilað með flestum yngri landsliðum Englands, en þar sem faðir hans er frá Nígeríu getur hann enn kosið að leika fremur með A-landsliði Nígeríu en því enska. 

Jordon Ibe hefur vakið mikla athygli á síðustu vikum, eða eftir að hann kom til baka úr lánsdvöl sinni hjá Derby County í janúar. Þessi 19 ára gamli drengur hefur leikið mjög vel fyrir Liverpool í undanförnum leikjum og þykir eitt mesta efni sem fram hefur komið lengi á Englandi. 

Hæfileikar Ibe eru þó ekki nýjar fréttir fyrir enska knattspyrnusambandið því hann hefur leikið með U-18, U-19 og U-20 landsliðum Englendinga og verður nánast örugglega með í U-21 árs landsliði enskra á EM í sumar. Það er að segja ef hann verður ekki búinn að skipta um landslið.

Liverpool Echo segir að nígeríska knattspyrnusambandið fylgist grannt með Ibe og ætli sér að setja sig í samband við hann á allra næstu dögum til að freista þess að sannfæra hann um að leggja ljónin þrjú til hliðar og klæðast frekar grænum landsliðsbúningi Nígeríu.