| Sf. Gutt

Um fyrrum leikmenn Liverpool á HM

Núverandi leikmenn Liverpool vekja auðvitað mesta athygli stuðningsmenna liðsins á HM en það eru líka nokkrir fyrrverandi menn á sveimi í Brasilíu. Allt í allt var heill liðshópur Liverpool á HM. 

Maxi Rodriguez var óvænt valinn í argentínska liðið. Hann spilar núna með Newell's Old Boys í Argentínu. Maxi tók þátt í fyrsta leik Argentínumanna í Brasilíu.

Með Maxi í argentínska liðinu er auðvitað Javier Mascherano. Hann hefur leikið allla leiki Argentínu til þessa og er fastamaður í liðinu.


Gabriel Paletta breytti landsliðsþjóðerni sínu úr Argentínu yfir í Ítalíu. Hann lék einn leik með Ítölum sem eru farnir heim. Gabriel leikur með Parma. 


Í ítalska liðinu var líka Alberto Aquilani. Hann spilaði þó ekkert í keppninni. Alberto leikur með Fiorentina og hefur verið þar frá því hann yfirgaf Liverpool.



Dirk Kuyt er líka all óvænt í hollenska liðinu og hefur þegar hér er komið við sögu leikið einn leik. Hann spilar núna með Fenerbahce og varð tyrkneskur meistari í vor.
 

Félagi Dirk hjá Fenerbache, Raul Meireles var með Portúgölum og spilaði alla þrjá leiki liðsins sem nú er farið heim.

Xabi Alonso var auðvitað í spænska landsliðshópnum. Hann lék alla þrjá leiki Spánverja og skoraði eitt mark. Spánverjar guldu afhroð og mögulega hættir Xabi núna með landsliðinu eins og fleiri af meistaraliði þeirra.
 

Sama má segja um Fernando Torres en landsliðsferill hans er kannski kominn að endapunkti. Hann kom við sögu í öllum þremur leikjum Spánar og skoraði eitt mark. 

Í marki Kamerún á HM stóð Charles Itandje. Hann var á mála hjá Liverpool frá 2007 til 2010 og spilaði sjö leiki. Charles fæddist í Frakklandi og lék með undir 21. árs liði Frakka en líkt og Gabriel Paletta ákvað hann að breyta um landslið og fara að spila með Kamerún en hann er ættaður þaðan. Charles hefur verið fastamaður í marki Kamerún frá því hann ákvað að spila fyrir hönd þeirra, lék alla leikina á HM og stóð sig vel. Hann er núna lánsmaður hjá tyrkneska liðinu Konyaspor en hann er leikmaður PAOK í Grikklandi.

Svo er það Carl Medjani. Hann hefur spilað alla leiki Alsír hingað til og staðið sig vel í hjarta varnarinnar. Gerard Houllier hafði mikið álit á Carl og fékk hann til Liverpool árið 2003. Carl komst reyndar bara einu sinni á varamannabekk aðalliðsins og yfirgaf Liverpool 2006. Hann hefur leikið með ýmsum liðum í Frakklandi frá því hann fór frá Liverpool og nú er hann á mála hjá Monaco. Hann hefur þó verið lánaður frá Monaco til Olympiakos í Grikklandi og nú á síðustu leiktíð var hann í láni hjá franska liðinu Valenciennes. Sem fyrr segir þá var Carl mjög efnilegur á yngri árum og lék með öllum yngri landsliðum Frakka upp í undir 21. árs liðið. Carl er af alsírskum ættum og hefur leikið með landsliði Alsír frá árinu 2010.

Að síðustu skal Victor Moses nefndur þó Liverpool hafi ekki átt hann. Hann var lánaður til Liverpool frá Chelsea á síðasta keppnistímabili. Victor spilar með Nígeríu og var valinn besti leikmaður landsins fyrir síðasta ár. Victor, líkt og sumir hér fyrrtaldir, skipti um landslið. Hann var búinn að spila með yngri landsliðum Englands áður en hann gekk til liðs við Nígeríu. 

Með þeim 12 leikmönnum Liverpool sem voru valdir til Brasilíufarar voru 23 nú- og fyrrverandi leikmenn Liverpool á HM 2014. Það er heill landsliðhópur og hefði verið fróðlegt að sjá hvernig þessum hóp hefði vegnað saman!

Svo er að sjá hvort einhverjir tilvonandi leikmenn Liverpool eru í Brasilíu. Miðað við fréttir síðustu daga er að minnsta kosti líklegt að Adam Lallana sé tilvonandi leikmaður Liverpool og vonandi einhverjir fleiri góðir.  

TIL BAKA
Nýlegar fréttir
Fleiri fréttir
Fréttageymslan