Luis leyfði mér að skjóta!

Glæsilegt mark Steven Gerrard beint úr aukspyrnu kom Liverpool á bragðið og lagði grunn að sætum 2:1 sigri á Sunderland á miðvikudagskvöldið. Eftir leikinn sagði Steven Gerrard að Luis Suarez hafi leyft honum að skjóta úr aukaspyrnunni!

,,Ég fæ nú venjulega ekki að taka þær. Suarez hefur verið frábær í aukaspyrnunum en stundum þarf að breyta til og ég fékk að reyna mig að þessu sinni. Suarez leyfði mér að taka þessa! Hann vildi ekki leyfa mér að reyna í Cardiff en það skiptir ekki máli hver skorar mörkin."

Aukaspyrnan hjá Steven var mögnuð og markmaður Sunderland kom engum vörnum við. Þetta var 12. mark Steven á leiktíðinni. Hann hefur að auki lagt upp nokkur og það þarf ekki að fara mörgum orðum um hversu stórt og mikilvægt hlutverk fyrirliðinn leikur í liðinu sínu. Hann er einfaldlega búinn að vera einn besti miðjumaður deildarinnar á þessu keppnistímabili. Flóknara er það nú ekki!