Loksins deildarsigur í Stoke!

Eitt er það sem merkilegt er í knattspyrnunni og það er slæmt eða gott gengi liða á ákveðnum leikvöngum. Gott dæmi um slæmt gengi eru heimsóknir Liverpool á Britannia leikvanginn í Stoke. Hinn magnaði 3:5 sigur Liverpool í Stoke var fyrsti deildarsigur liðsins á þeim leikvangi í fimm heimsóknum. Liverpool vann reyndar oft á gamla heimavelli Stoke Victoria Ground.  

Liverpool hafði reyndar unnið tvo Deildarbikarleiki þar 0:8 á sparktíðinni 2000/01 þegar Íslendingar áttu félagið og 1:2 2011/12 þegar Luis Suarez skoraði tvö glæsileg mörk. En frá því Stoke komst upp í efstu deild á leiktíðinni 2008/09 hafði Liverpool aldrei unnið þar og varla skorað mark. Dómar höfðu verið óhagstæðir, tréverk þvælst fyrir í tíma og ótíma og miklir yfirburðir höfðu ekki dugað neitt. Sem sagt allt gekk í móti og það leiktíð eftir leiktíð. En loksins, loksins náðist sigur þar og var sá aldeilis vel þeginn. Það er margt merkilegt í knattspyrnuveröldinni og nú er að vona að ísinn sé brotinn og Liverpool gangi betur í Stoke á komandi árum!

Það er kannski vísir að titli að vinna á Britannia því í bæði skiptin sem Liverpool vann þar í Deildarbikarnum vannst bikarinn. Gæti deildartitillinn unnist núna fyrst loksins tókst að vinna deildarsigur í Stoke? Sjáum til!