| Sf. Gutt

Simon hlakkar til að fara til Sunderland

Simon Mignolet mætir á sinn gamla heimavöll á sunnudaginn þegar Liverpool tekur hús á Sunderland á Leikvangi ljóssins. Simon segist vonast til að gamla liðinu hans fari að ganga betur en þó ekki alveg strax.

,,Þetta er í fyrsta sinn sem ég sný aftur og ég hlakka mikið til að koma aftur á leikvanginn. Ég þekki fullt af fólki þarna frá því ég var þar og ég hlakka til að hitta það á nýjan leik og spjalla. En mestu skiptir að við náum þeim úrslitum sem við stefnum á. Við verðum að ná þremur stigum."

Sunderland mætir, á sunnudaginn, í fyrsta deildarleikinn eftir að Ítalanum Paolo Di Canio var vikið úr starfi framkvæmdastjóra. Liðinu hefur vegnað illa það sem af er leiktíðar og Simon vonar að gamla liðinu hans fari að ganga betur en bara ekki alveg strax!

,,Ég var þarna í þrjú ár svo ég þekki marga og mér finnst ekki gott að sjá liðið í vanda. Þeir voru óheppnir í byrjun leiktíðar og vonandi ná þeir að snúa við blaðinu en þó ekki fyrr en eftir sunnudaginn!"

Vonandi gengur Simon Mignolet og félögum hans í Liverpool vel á sunnudaginn en það verður örugglega erfitt að eiga við heimamenn sem mæta vafalaust grimmir til leiks eftir stjóraskiptin. Síðustu árin hefur Liverpool gengið vel að skora framhjá Simon í marki Sunderland og þá sérstaklega Luis Suarez. Vonandi gengur Luis vel að skora hjá þeim sem stendur núna í marki Sunderland! 

TIL BAKA
Nýlegar fréttir
Fleiri fréttir
Fréttageymslan