Pepe og Carra leikfærir

Liverpool tapaði síðasta leik illa þegar liðið steinlá 3:1 fyrir Southampton. Bæði Jose Reina og Jamie Carragher misstu af þeim leik og þótti muna um þá og sérstaklega Jamie. Reyndar var Brad af mörgum talinn besti leikmaður Liverpool í leiknum svo það var ekki við hann að sakast með mörkin þrjú en vörnin var sérlega óörugg.

En nú eru þeir Jose og Jamie leikfærir á nýjan leik og verða til taks í páskaleiknum á Villa Park. Liverpool bíður þar erfiður leikur því Aston Villa hefur unnið tvo síðustu leiki í erfiðri fallbaráttu. Það verður sérstaklega gott að fá Jamie aftur í vörnina en hann hefur verið magnaður frá því hann kom inn í aðalliðið í janúar.