Sturridge ekki með í kvöld

Liverpool Echo fullyrðir í dag að Daniel Sturridge verði ekki klár í slaginn gegn WBA í kvöld.

Sturridge fékk högg á lærið í leiknum gegn Manchester City og gaf af þeim sökum ekki kost á sér í landsleik Englendinga og Brasilíumanna í vikunni. Samkvæmt heimildum Echo mun hann ekki hafa náð sér að fullu og verður því ekki með í kvöld.

Ljóst er að Sturridge verður sárt saknað í framlínunni í kvöld, en hann hefur farið gríðarlega vel af stað síðan hann kom til liðsins í lok janúar. Skorað 4 mörk í 6 leikjum og lífgað mjög upp á sóknarleik liðsins.

Líklegt þykir að annaðhvort Fabio Borini eða Raheem Sterling taki sæti Sturridge í liðinu. Þá er reiknað með að nýjasti leikmaður Liverpool Philippe Coutinho verði í hópnum í kvöld.

Daniel Sturridge má ekki leika í Evrópudeildinni þannig að hann verður ekki heldur með í leknum gegn Zenit á fimmtudaginn.