Jon Flanagan frá vegna meiðsla

Bakvörðurinn Jon Flanagan lenti illa í því í varaliðsleiknum við Southampton á mánudaginn. Hann varð fyrir meiðslum á hné og verður frá í allt að þrjá mánuði.

Jon hefur oftast leikið sem hægri bakvörður í aðalliði Liverpool og þykir mjög efnilegur. Hann hefur aðeins leikið tvo leiki á þessari leiktíð. Sá seinni var um daginn á móti Mansfield í F.A. bikarnum en þá kom hann inn á sem varamaður. Jon kom aðeins við sögu á síðustu leiktíð og þeirri þar á undan þegar hann lék sinn fyrsta leik. Líklega á hann ekki eftir að spila mikið það sem eftir lifir þessarar. 

Meiðslin eru auðvitað mikið áfall fyrir Jon en hann er ungur að árum og vonandi nær hann sér vel. Hann varð tvítugur á nýársdag.