Bannað að tækla!

Jonjo Shelvey hefur vakið verðskuldaða athygli á þessari leiktíð. Hann hefur leikið vel en ekki síður hafa harðar tæklingar hans vakið athygli. Jonjo þykir harður í horn að taka og nú þegar hefur hann setið af sér þriggja leikja bann eftir brottrekstur á móti Manchester United. Reyndar var sá brottrekstur mjög umdeildur. En Jonjo vill gjarnan geta spilað fastar!

,,Maður verður að fara varlega í því sem maður gerir og segir nú til dags. Snerting er alltaf minna og minna leyfð í knattspyrnu. Maður sér núna leikmenn fá refsingu fyrir það sem manni finnst góð gamaldags tækling. Maður kemst ekki upp með allt. En hvernig getur maður hætt við tæklingu þegar möguleiki er á því að vinna boltann? Knattspyrnuáhugamenn vilja sjá svona tæklingar en tímarnir hafa breyst og við verðum að aðlaga okkur að því. Núna læra menn ekki að tækla á æfingavellinum. Maður lærir að skjóta, senda boltann en ekki að tækla."
 
Það verður örugglega nóg um tæklingar á Goodison Park á morgun. Það hefur ekkert vantað upp á þær í grannarimmum síðustu ára enda hafa leikmenn gjarnan fokið út af. Nú er að sjá hvort Jonjo verður valinn í liðið á móti Everton og þá hvort hann lýkur leiknum!