Fabio Aurelio fer

Nú er leiktíðinni lokið og einhverjir leikmenn Liverpool munu fara í sumar. Nú þegar hefur ein brottför verið staðfest. Um er að ræða brasilíska bakvörðinn Fabio Aurelio. Hann var reyndar búinn að ákveða brottför fyrir tveimur árum en Roy Hodgson bauð honum óvænt að vera áfram til tveggja ára. Nú er sá tími liðinn.
 
Kenny Dalglish staðfesti brottför Fabio á blaðamannafundi fyrir helgina og sagði ástæðu hennar vera þá að samningnur Brasilíumannsins væri útrunninn. Fabio, sem kom til Liverpool sumarið 2006, lék aðeins þrjá leiki á þessari leiktíð og var lengi frá vegna meiðsla eins og svo oft áður á ferli sínum hjá Liverpool.

Ekki hefur verið greint frá því hvert Fabio fer en við, á Liverpool.is, látum vita af því þegar það kemur í ljós.