Bikarar til bóta!

Steven Gerrard eins og aðrir tengdir Liverpool vita að framganga liðsins í deildinni á þessari leiktíð hefur verið algjörlega óásættanleg. En hann telur að tveir bikarar yrðu til mikilla bóta. Liverpool hefur nú þegar náð Deildarbikarnum í hús og á laugardaginn er möguleiki á að koma F.A. bikarnum í sama húsið!

,,Þetta félag snýst um að vinna bikara. Stórbikara og F.A. bikarinn er sannarlega einn af þeim stóru. Við munum meta þetta keppnistímabil eftir helgina. Ef við getum sagt þá að við höfum unnið tvo bikara getum við verið ánægðir. En við þurfum að skoða þau vandamál sem valda því að við erum ekki betur staddir í deildinni."
 
,,Bikarar eru til marks um velgengni og þeir eru ástæðan fyrir því að maður tekur þátt í þessari íþrótt. Sumt af því magnaðasta sem maður hefur upplifað í gegnum árin tengist því að vinna bikara, Evrópubikarinn, F.A. bikarinn, Evrópubikar félagsliða og Deildarbikarinn. Þetta eru þau kvöld og þeir dagar sem maður minnist með gleði."

,,F.A. bikarinn er einstakur í sinni röð en Deildarbikarinn færði okkur líka sigurgleði. Sigurinn í honum mun hjálpa yngri leikmönnunum í liðshópnum. Sjálfstraust eflist við sigra og maður vill meira af slíku."

,,Okkur er það fullljóst að við höfum ekki staðið undir væntingum í deildinni en liðshópurinn er betri en staðan segir til um. Við eigum eftir að meta keppnistímabilið og pressan á okkur minnkar aðeins ef okkur tekst að vinna tvo bikara. Fólk mun leggja mat á okkur eftir laugardaginn. Það á eftir að segja að við höfum ekki staðið okkur vel í deildinni. En við gætum fært mótrök með því að segja að þó það sé rétt þá höfum við samt sem unnið tvo bikara."
 
Steven Gerrard fór fyrir sínu liði í Cardiff þegar Liverpool vann F.A. bikarinn síðast. Hann skoraði þá tvö mörk í 3:3 jafntefli og svo úr einu víti í vítaspyrnukeppninni sem Liverpool vann. Steven gæti unnið F.A. bikarinn í þriðja sinn á laugardaginn og hann mun ekki láta sitt eftir liggja í rimmunni við Chelsea. Framganga hans gæti skipt sköpum ef Liverpool á að geta náð F.A. bikarnum í hús með Deildarbikarnum.