Brad Jones væntanlega á spjöld sögunnar

Fari svo að Brad Jones standi í marki Liverpool á morgun kemst hann í sögubækurnar fyrir að vera fyrsti leikmaður Liverpool sem leikur fyrstu fjóra leiki sína fyrir liðið í fjórum mismunandi keppnum!

Hans fyrsti leikur í aðalliðinu var nefnilega gegn Northampton í deildabikarnum á síðustu leiktíð. Leikur sem stuðningsmenn Liverpool vilja reyndar helst gleyma. Næsti leikur með aðalliðinu kom síðan gegn Utrecht í Evrópudeildinni á sömu leiktíð. Sá leikur endaði með markalausu jafntefli.

Fyrsta innkoma Jones á þessari leiktíð var í deildarleiknum gegn Blackburn á þriðjudaginn, þegar hann kom inn á fyrir Doni, og leikurinn á Wembley á morgun er síðan vitanlega í FA-bikarnum.

Jafnvel þótt það hafi nú verið staðfest að Peter Gulacsi hafi verið kallaður úr láni frá Hull verður að teljast líklegt að Jones verði settur í markið á morgun. Hann kemst þá í sögubækurnar fyrir þetta sérkennilega leikjaprógramm.