Mál að linni!

Kenny Dalglish segir að það sé mál til komið að láta máli Luis Suarez lokið. Mikil spenna er fyrir leik Liverpool og Manchester United sem fer fram á Old Trafford á laugardaginn. Luis mun þar mæta Patrice Evra en hnútukast þeirra í leik liðanna í haust dró dilk á eftir sér eins og allir vita. Kenny sagði meðal annars þetta í viðtali við Liverpoolfc.tv.

,,Allir sem að koma, fjölmiðlarnir, stuðningsmennirnir og bæði lið bera ábyrgð á því að sjá svo um að helgarinnar verði minnst fyrir hörku knattspyrnuleik á milli tveggja mjög góðra liða en ekki eitthvað annað. Mér fannst allir sem tóku þátt í leik liðanna í F.A. bikarnum á Anfield hafi lagt sitt af mörkum til að leikurinn yrði spilaður í góðum anda. Við skulum því láta það sama gerast núna um helgina."

,,Ég er viss um að fólk vill tala um Luis Suarez en hann sætti sig við bannið sem hann fékk, sat það af sér og kom svo aftur til leiks gegn Spurs á mánudaginn. Það er kominn tími til að láta málinu lokið og halda fram á veginn. Fólk er nú þegar farið að velta sér upp úr því hvað gerist fyrir leikinn en ég veit að Luis, og við höfum rætt við hann, ætlar að takast í hendur við Patrice Evra og aðra leikmenn Manchester United fyrir leikinn."

Nú er að vona að leikmenn liðanna haldi haus á laugardaginn eins og í bikarleiknum um daginn. Luis Suarez á þó eftir að fá það óþvegið frá áhorfendum á Old Trafford á laugardaginn líkt og Patrice Evra á Anfield Road um daginn. En vonandi ræður íþróttaandinn ríkjum inni á vellinum.