Mæting í Musterið á þrettándakvöld!

Það er mæting í Musterið á þrettándakvöldi. Ekki verða nú jólin beint kvödd þar heldur hefst vegferð Liverpool í F.A. bikarnum. Liverpool mætir þar Oldham Athletic í 3. umferð F.A. bikarsins og vonandi mun sönn þrettándagleði ríkja hjá stuðningsmönnum Liverpool.

Heldur er óvenjulegt að leikur í F.A. bikarkeppninni fari fram á föstudagskvöldi en Everton á líka heimaleik í þessari umferð og sá var fastsettur á undan því Oldham þurfti aukaleik. Liverpool varð því að spila á öðrum degi og að ráði varð að leika á föstudagskvöldi.

Liverpool hefur ekki unnið F.A. bikarinn frá 2006 og hafa margir slæmir útslættir orðið frá þeim sigri. Nú er að vona að liðið nái alla leið á Wembley í vor. Liðið er jú komið í undanúrslit í Deildarbikarnum og góð rispa í F.A. bikarnum er líka orðin löngu tímabær.