Suarez missir af Newcastle leiknum

Luis Suarez hefur verið dæmdur í eins leiks bann vegna ósæmilegrar hegðunar gegn Fulham fyrr í mánuðinum.  Missir hann af næsta leik sem er gegn Newcastle á föstudagskvöldið.

Enska knattspyrnusambandið ákærði Suarez fyrir að sýna puttann til stuðningsmanna Fulham og viðurkenndi Suarez ósæmilega hegðun og þar með brot sitt. Fyrir utan leikbannið fékk Luis 20.000 pund í sekt og formlega viðvörun um að hegða sér framvegis vel. 

Jafnframt hefur Liverpool F.C. fengið sekt upp á 20.000 pund fyrir að hafa ekki haft stjórn á leikmönnum sínum í umræddum leik.  Leikmenn létu margir hverjir Kevin Friend fá orð í eyra eftir að hann gaf Jay Spearing beint rautt spjald fyrir tæklingu í leiknum.