Maxi er frábær fyrirmynd

Kenny Dalglish er ánægður með framlag Maxi Rodriguez til liðsins og segist helst vilja nota hann í hverjum einasta leik.

Maxi hefur mátt þola nokkuð langa bið á bekknum hjá Liverpool en þegar hann hefur fengið tækifæri hefur hann oftast nær nýtt það vel.

Hann hefur nú skorað 10 mörk í síðustu 9 leikjum sem hann hefur verið í byrjunarliðinu, sem verður að teljast ansi góður árangur. Að minnsta kosti hjá miðjumanni. 

Kenny Dalglish er afar ánægður með framlag Argentínumannsins til Liverpool liðsins og segir hann framúrskarandi atvinnumann.

,,Maxi er algjör fagmaður. Margir gætu lært af honum. Trúið mér, ég vildi helst geta notað hann í hverjum einasta leik", segir Dalglish í viðtali við Daily Mirror.

,,Hann hefur frábært markahlutfall núna og hann er líka góður og klár fótboltamaður. Hann er kannski farinn að nálgast mig ískyggilega í aldri núna, en það breytir því ekki að hann er góður og snjall spilari og prýðilegur markaskorari líka. Hann veit hvernig á að gera hlutina"

,,Maxi, Craig (Bellamy) og Carragher eru gott dæmi um topp atvinnumenn. Þeir eru kannski komnir af léttasta skeiði en þeir eru ennþá í frábæru formi. Það hvernig þeir æfa, hvernig þeir undirbúa sig og hvernig þeir hugsa um sig er til fyrirmyndar fyrir alla."