| Sf. Gutt

Þarf að brjóta ís!

Liverpool að þarf að brjóta ís í kvöld til að halda Deildarbikardraumi sínum á lífi. Eins og allir vita þá hefur Liverpool enn ekki tekist að leggja Stoke City að velli á útivelli frá því harðjaxlarnir komust upp í efstu deild.

Liverpool tapaði 1:0 fyrr í haust í leik sem liðið hafði nokkra yfirburði í en umdeild vítaspyrna dugði heimamönnum til sigurs. Á síðustu leiktíð vann Stoke sanngjarnan sigur 2:0 og næstu tvær leiktíðir á undan skildu liðin jöfn. Fyrst 0:0 og bjargaði tréverkið heimamönnum tvisvar þá og svo 1:1 en þá jafnaði Stoke á síðustu stundu. Það hefur því gengið bölvanlega að ná góðum úrslitum á Britannia leikvanginum í deildinni.

Liverpool vann þó metsigur í fyrstu heimsókn sinni á Britannia leikvanginn og það var einmitt í Deildarbikarnum leiktíðina 2000/01. Liverpool skoraði þá átta sinnum á móti Stoke sem þá var Íslendingalið undir stjórn Guðjóns Þórðarsonar. Robbie Fowler skoraði þrennu í leiknum og fór heim með keppnisboltann. Þetta var og er stærsti útisigur Liverpool í þessari keppni.

Nú í kvöld verður Liverpool að brjóta ísinn á Britannia leikvanginum og herja fram sigur hvernig sem farið verður að því. Að öðrum kosti fer liðið ekki lengra í Deildarbikarnum en það er mjög mikilvægt að komast áfram í þeirri ágætu keppni. Leikið verður til þrautar í kvöld með framlengingu og vítaspyrnukeppni ef með þarf.  

TIL BAKA
Nýlegar fréttir
Fleiri fréttir
Fréttageymslan