Christian Poulsen til Evian?

Liverpool hefur samþykkt tilboð franska liðsins Evian í danska landsliðsmannin Christian Poulsen. Þetta var tilkynnt á opinberri heimasíðu Liverpool fyrir stundu.

Ekkert hefur enn verið gefið upp um kaupverð, en á heimasíðu Liverpool segir að félagið hafi gefið franska félaginu, sem heitir fullu nafni Evian Thonon Gaillard og komst upp í efstu deild á síðustu leiktíð, leyfi til þess að ræða við Poulsen.

Það var Roy Hodgson sem fékk Poulsen til Liverpool til að fylla skarð Javier Mascherano aftast á miðjunni, en óhætt er að segja að Daninn hafi ekki átt sjö dagana sæla á Anfield eftir að Kenny Dalglish tók við af Hodgson. Því verður að teljast líklegt að hann grípi tækifærið til að komast til annars liðs fegins hendi.