Alberto Aquilani lánaður til AC Milan

Tilkynnt var nú seinnipartinn að samkomulag hefði tekist á milli Liverpool og AC Milan um að lána Ítalann Alberto Aquilani út tímabilið.  Milan menn hafa svo möguleika á því að kaupa hann í lok tímabils.

Damien Comolli sagði af þessu tilefni:  ,,Ég vil hrósa því hvernig Alberto hefur staðið sig í þessu ferli öllu."

,,Í gegnum allt ferlið, hefur hans eina ósk verið sú að spila knattspyrnu. Hann hefur sett þetta ofar öllu öðru og það hefur haft í för með sér kostnað fyrir hann persónulega.  Við óskum honum góðs gengis fyrir komandi tímabil."

Alberto lék, eins og allir vita, ekkert með Liverpool á síðasta keppnistímabili en þá var hann lánsmaður hjá Juventus. Ítalinn þótti einn besti leikmaður Liverpool á undirbúningstímabilinu en hann var aldrei valinn í liðshópinn eftir að keppnistímabilið hófst.

Fyrst Alberto hefur verið lánaður núna má leiða líkum að því að hann spili ekki meira með Liverpool og verði seldur.