Fágætt afrek

Martin Skrtel vann fágætt afrek, með Liverpool, á nýliðnu keppnistímabili. Þegar hann gekk af leikvelli gegn Aston Villa hafði hann leikið hverja einustu mínútu í hverjum einasta deildarleik Liverpool.  Alls lék hann 3591 mínútur og í leikjunum 38 skoraði hann tvö mörk.

Það er mjög fátítt nú til dags að útileikmaður nái að spila hverja einustu mínútu í deildarleikjunum og á síðustu leiktíð náði aðeins einn annar útileikmaður þessu. Það var Leighton Baines bakvörður Everton.
 
Martin var annar tveggja leikmanna Liverpool sem lék allar mínútur í deildinni. Hinn var Jose Reina en það gerist af og til að markverðir nái þessu. Jose lék alls 50 af þeim 54 leikjum sem Liverpool lék í öllum keppnum en Martin kom næstur með 49 leiki. 

Martin Skrtel var mjög öflugur í vörn Liverpool og átti kannski sína bestu leiktíð eftir að hann kom til Englands. En hann sýndi líka mikla keppnishörku því hann lék síðustu vikurnar hálfmeiddur.