Stórkostlegur leikur

Segja má að Luis Suarez hafi gengið berserksgang í gærkvöldi þegar hann átti stórleik gegn Fulham. Varnarmenn Fulham réðu ekkert við hann og hann var ógnandi frá fyrstu til síðustu mínútu.

Kenny Dalglish segir Luis Suarez hafa spilað miklu betur en hann og aðrir áttu von á eftir að hann kom til Liverpool.
 
,,Hann var stórkostlegur. Hann var hlaupandi á fullu jafnt undir lokin og í byrjun. Hann olli þeim alls konar vandræðum"

Margir áttu von á því að Úrúgvæinn myndi vera nokkurn tíma að koma sér fyrir í nýjum heimkynnum en annað hefur komið á daginn.

,,Hann hefur sannarlega náð að koma sér vel fyrir og hann og fjölskyldan hans eiga hrós skilið fyrir hvað þau hafa lagt á sig. Þau hafa komið sér vel fyrir á svæðinu og hann er búinn að átta sig á öllu hér í sambandi við knattspyrnuna. Ég held að okkur hafi ekki dottið í hug í okkar viltustu draumum að hann myndi vera svona fljótur að aðlagast öllu og láta til sín taka í ensku knattspyrnunni eins og raun ber vitni. Hann hefur prýtt leikvöllinn í hvert skipti sem hann hefur spilað."