Félagsmet hjá Jose Reina

Jose Reina gat verið stoltur eftir 3:0 sigurleik Liverpool gegn Aston Villa í gærkvöldi. Jose hélt markinu hreinu og þar með var hann búinn að setja nýtt félagsmet og ekki það fyrsta frá því hann kom til Liverpool.

Metið sem Jose setti fólst í því að hann hélt marki Liverpool hreinu í 100. skipti í deildarleik. Hefur enginn markmaður í sögu Liverpool haldið markinu hreinu 100 sinnum í eins fáum leikjum. Leikurinn gegn Aston Villa var 198. deildarleikur Jose í marki Liverpool.
 
Goðsögnin Ray Clemence átti gamla metið sem var 217 leikir. Önnur goðsögn, Bruce Grobbelaar, náði 100 sinnum hreinu í 225 leikjum.

Þetta nýja met Jose Reina er enn eitt merki þess hversu magnaður markmaður Spánverjinn er. Staðreyndin er sú að hann er orðinn einn besti markmaður í sögu Liverpool og er þó af mörgum mögnuðum markmönnum að taka.