Jamie tilbúinn í slaginn

Það fór nú ekki mikið fyrir þeim tíðindum á mánudaginn viðburðaríka að Jamie Carragher væri orðinn leikfær. Hann fór úr axlarlið gegn Tottenham á White Hart Lane í lok nóvember og í kjölfarið fór hann í aðgerð til að laga meiðslin. Endurhæfingin hefur gengið vel og nú er Jamie tilbúinn í slaginn. Líklega verður hann í liðshópi Liverpool í kvöld. 

Vörn Liverpool versnaði  og varð óöruggari eftir að Jamie meiddist og ekki gerði það Roy Hodgson auðveldara fyrir í starfi. Jamie er farinn að eldast og er ekki eins snar í snúningum og áður en hann stjórnar vörninni betur en nokkur annar. Það er því mikill fengur að því að fá Carra aftur í liðið.