Fer Fernando núna frá Liverpool?

Einhverjir fjölmiðlar telja sig hafa heimildir fyrir því að Fernando Torres hafi hug á því að yfirgefa Liverpool núna áður en lokað verður fyrir félagaskipti.

Eins og fram kom í fjölmiðlum í morgun þá hafnaði Liverpool tilboði í Fernando frá Chelsea. Það tilboð á að hafa verið um 35 milljónir sterlingspunda.

En samkvæmt fyrrnefndum fréttum, til dæmis á Sky sports og vefsíðu Guardian, þá á Fernando að hafa beðið forráðamenn Liverpool í dag um að hafa samband við Chelsea með það í huga að selja hann. Ekki eitt einasta orð hefur komið úr herbúðum Liverpool Football Club um þetta mál. 

Hvað sem hæft er í þessu þá væri hægt að selja Fernando því nú hefur verið gengið frá kaupum á Luis Suarez. Fjölmiðlar hafa hamrað á meintri óánægju Fernando Torres allt frá því í sumar og hefur líkamstjáning hans aðallega verið heimildin. Þrátt fyrir þær fréttir hefur ekki verið talið að Fernando vilji fara núna og hann sagði fyrr í þessum mánuði að hann ætlaði að vera áfram hjá Liverpool. 

Það væri þó ólíkt betra að hafa þá báða, Fernando og Luis, í sókninni hjá Liverpool en séu menn ekki ánægðir er best að selja þá hvað svo sem þeir heita.