Babel til Hoffenheim eftir allt!

Ryan Babel hefur samþykkt að ganga til liðs við Hoffenheim, þetta var tilkynnt seinnipartinn í gær.

Babel flýgur til Þýskalands í dag til að ganga frá samningi við þýska félagið.  Hjá Hoffenheim hittir Babel fyrir Gylfa Sigurðsson.

Allt leit út fyrir að Babel myndi ekki fara frá félaginu í janúar og í gærdag bárust fréttir af því að Kenny Dalglish hafi sagt að Hollendingurinn væri ekki á förum.  Annað kom svo í ljós þegar leið á daginn.  Tilboð í Babel var samþykkt fyrir viku síðan og því má kannski segja að söluferlið hafi tekið óvenju langan tíma.

Babel spilaði alls 145 leiki fyrir félagið og skoraði í þeim 22 mörk.  Stuðningsmenn minnast hans helst fyrir vasklega framgöngu gegn Arsenal í Meistaradeildinni en hann fiskaði vítaspyrnu og skoraði lokamarkið í 4:2 sigri á Anfield sem kom liðinu í undanúrslit keppninnar það árið.  Hann skoraði einnig sigurmarkið 2:1 gegn Manchester United á Anfield í september 2008.