Ryan Babel sektaður

Enska knattspyrnusambandið sektaði í gær Ryan Babel fyrir að hafa birt grínmynd af Howard Webb dómara á Twitter síðu sinni. Á myndinni var Howard klæddur í búning Manchester United. Þetta gerði Ryan eftir tap Liverpool gegn Manchester United í F.A. bikarnum. Leikmönnum Liverpool þótti Howard hafa gefið United vítaspyrnuna sem réði úrslitum. Fyrst var talið að Ryan hefði útbúið myndina sjálfur en raunin var sú að hann áframsendi myndina sem einhver annar setti saman. 

Ryan var sektaður um tíu þúsund sterlingspund sem eru hátt í tvær milljónir íslenskra króna ef rétt er reiknað. Um leið var hann varaður við að nota vefmiðla ekki í svona tilgangi aftur. Reyndar var viðvörunin almenn og henni bent jafnt til annarra leikmanna í ensku deildarkeppninni.