Charles Itandje yfirgefur Liverpool

Charles Itandje fer frá Liverpool núna um áramótin. Franski markmaðurinn hefur verið lengi á launaskrá án þess að spila en nú er komið að því að hann fari á braut. Slíkt er auðvitað gott fyrir launareikning félagsins enda lítið vit í að borga leikmönnum kaup sem aldrei spila og gera þannig ekkert gagn. 

Charles mun fara til Grikklands þar sem hann hefur gert samning við Atromitos og tekur samningurinn gildi á nýársdag. Samningurinn gildir í tvö og hálft ár. 

Charles Itandje kom til Liverpool frá franska liðinu Lens sumarið 2007. Hann lék alls sjö leiki með Liverpool. Hann var nú ekki sannfærandi í þessum leikjum og fékk á sig átta mörk. Reyndar voru þetta allt bikarleikir og vörn liðsins var gjarnan mikið breytt í þeim leikjum frá deildarleikjum.  

Leikina sjö lék Charles á leiktíðinni 2007/08 og alla tíð síðan hefur hann verið á kaupi án þess að spila og það ekki einu sinni með varaliðinu!