Heppnismark á Íslandi!

Flestir stuðningsmenn Liverpool á Íslandi muna vel eftir hinu stórglæsilega marki sem Raul Meireles skoraði á Laugardalsvellinum í haust. Hann skoraði þá með bylmingsskoti af um þrjátíu metra færi. Hann sjálfur segir markið hafa verið heppnismark!

,,Mér finnst gaman að skjóta af löngu færi og ég tel mig ráða vel við það. Markið sem ég skoraði gegn Íslandi var nú samt eiginlega heppnismark. Ég vona að ég geti fljótlega skorað fyrir Liverpool. Það er alltaf mjög gaman að skora og það væri frábært að skora fyrir Liverpool og þá sérstaklega á Anfield."

Raul hefur líklega staðið sig best af þeim leikmönnum sem komu til Liverpool í sumar og hann átti stórleik gegn West Ham United um helgina. Þar lék hann líka í sinni bestu stöðu á miðri miðjunni.

,,Mér finnst best að spila á miðri miðjunni en ég spila hvar svo sem framkvæmdastjórinn vill. Það er mitt starf að leika þar sem mín er þörf. Ég hef lagt mig fram um að sinna mínu og vinna að því að verða góður liðsmaður Liverpool og hjálpa liðinu."


Trúlega á Raul eftir að vera inni á miðjunni í næstu leikjum því Steven Gerrard verður ekki tiltækur að sinni. Það er enginn spurning um að Portúgalinn á að spila þar.