Fernando tæpur vegna meiðsla

Fernando Torres meiddist á ökkla í tapleiknum gegn Stoke á laugardaginn. Hann er samt í spænska landsliðhópnum sem er að undirbúa sig fyrir vináttuleik gegn Portúgal á miðvikudagskvöldið.

Hermt var á Liverpoolfc.tv að læknalið spænska landsliðsins myndi meta hvort Fernando væri leikfær þegar kæmi að landsleiknum. Nokkuð undarlegt verður að teljast að forráðmenn Liverpool hafi ekki einfaldlega tilkynnt forföll fyrir Fernando fyrir þennan þýðingarlitla vináttulandsleik.

Roy Hodgson sagði, eftir leikinn við Stoke, að Fernando hefði meiðst á ökkla. Þjálfarar Liverpool vildu taka hann af velli en Fernando harkaði af sér og vildi ljúka leiknum sem hann og gerði.
 
Það er vonandi að Fernando Torres verði til í slaginn þegar Liverpool leikur sinn næsta leik en liðið mætir West Ham United á laugardaginn kemur.