Hodgson himinlifandi með sigurinn

Roy Hodgson er himinlifandi eftir góðan sigur Liverpool á Blackburn í dag. Sérstaklega segist hann glaður yfir því að Fernando Torres skyldi loksins finna netmöskvana.

,,Það var góð tilfinning að ná loks að landa sigri í dag. Ég er sérstaklega ánægður með þátt Fernando Torres í leiknum, hann olli varnarmönnum Blackburn miklum vandræðum allan tímann og endaði svo á því að skora sigurmarkið. Hann getur farið glaður í háttinn í kvöld", segir Hodgson.

,,Að mínu mati var þetta besti leikur Fernando á þessu tímabili. Hann hefur verið í lægð allt frá því síðasta vor og var gagnrýndur mikið fyrir frammistöðu sína á HM í sumar. Ég er þess vegna mjög ánægður fyrir hans hönd að hann skyldi eiga svona góðan leik í dag. Vonandi hefur hann fundið gleðina og sjálfstraustið á ný. Eitt er víst að við þurfum virkilega á fleiri mörkum frá honum að halda ef okkur á að takast að komast þangað sem við ætlum okkur".

,,Leikurinn í dag var góður af okkar hálfu. Við höfum séð svona spretti til liðsins en við höfum ekki náð að spila heilan leik vel fram að þessu. Við spiluðum þennan leik mjög vel og stjórnuðum spilinu algjörlega fyrstu 70 mínúturnar. Síðustu 20 mínútur leiksins misstum vð reyndar yfirhöndina, en það er kannski eðlilegt að það gerist þegar lið er að reyna að verja forskot. Sérstaklega þegar lið hefur ekki unnið leik eins og lengi og raunin er hjá okkur."

,,Ég er mjög ánægður með hvernig liðið spilaði, en eins og ég segi þá höfum við átt spretti áður en samt sem áður tapað leikjum eða gert jafntefli. Ég þori þess vegna ekki að fagna of mikið, en vonandi erum við komnir á rétta braut. Leikmennirnir voru fullir sjálfstraust og létu boltann ganga sín á milli af miklu öryggi. Það var meiri hraði og ógnun í okkar leik en verið hefur. Ég er mjög ánægður með það. Ég var líka sérstaklega ánægður með að liðið svaraði strax fyrir sig eftir jöfnunarmark Blackburn. Maður gat ekki annað en fórnað höndum þegar þeir skoruðu mark úr svo að segja sinni fyrstu sókn í leiknum! En sem betur fer sýndi liðið karakter og svaraði strax fyrir sig".