Krisztian Nemeth seldur

Ungliðinn Krisztian Nemeth hefur yfirgefið Liverpool. Hann mun leika með Albert Riera á næsta keppnistímabili. Tilkynnt var á heimasíðu Olympiakos í gær að félagið hefði gert þriggja ára samning við Ungverjann.

Krisztian þótti efnilegasti leikmaður Liverpool síðustu tvö árin eða svo. Hann skoraði mikið með varaliðinu og mörgum þótti líklegt að hann kæmist í aðalliðið. Þangað komst hann aldrei utan að leika nokkra æfingaleiki með því. Síðasta sumar skoraði hann tvívegis í æfingaleik í Singapúr. Liverpool vann 5:0 og Krisztian þótti leika mjög vel. Hann var á hinn bóginn lánaður til AEK Athens þar sem hann var allt síðasta keppnistímabili. Hann skoraði þrjú mörk í seytján leikjum samkvæmt vefsíðu Sky sport.

Samkvæmt sömu vefsíðu fær Liverpool 1,3 milljónir Evra fyrir Krisztian og verður það að teljast gott verð fyrir leikmann sem aldrei lék með aðalliðinu. Svo er að sjá hvort hann verður virkilega góður en hann hefur þótt efnilegastur Ungverja á seinni árum.