Javier kominn í jólafrí

Javier Mascherano var rekinn af leikvelli gegn Portsmouth á Fratton Park í gær. Argentínumaðurinn er þar með kominn í jólafrí og rúmlega það fram á næsta ár því hann fékk fjögurra leikja bann fyrir brottreksturinn.

Venjulega fá leikmenn þriggja leikja bann fyrir beint rautt spjald en þar sem þetta er í annað sinn, á þessu keppnistímabili, sem Javier er vikið af velli bætist einn leikur við hefðbundna refsingu. Leikirnir sem Javier missir af eru gegn Wolverhampton Wanderes á öðrum degi jóla, Aston Villa, Reading í F.A. bikarnum og sá fjórði er svo gegn Tottenham Hotspur en hann fer fram 10. janúar.  

Javier Mascherano hefur spilað vel í síðustu leikjum eftir að hafa verið daufur framan af leiktíðinni. Það verður því skarð fyrir skildi á miðjunni hjá Liverpool þegar sá argentínski fer í bannið. Reyndar er óvíst að hann hefði spilað í öllum þessum leikjum því hann meiddist á hné í atgangninum sem olli brottrekstrinum og var studdur af velli.