Carra hefur ekki gefist upp

Það eru ekki vænlegar horfur með að Liverpool komist upp úr sínum riðli í Meistaradeildinni eftir að síðbúið mark tryggði Lyon 1:1 jafntefli. Jamie Carragher, sem hefur verið fyrirliði Liverpool að undanförnu, er þó ekki búinn að gefast upp. Hann segir að menn verði að hafa trú á að Liverpool geti enn haft sig upp úr riðlinum.

"Jafntefli þýðir að við eigum enn möguleika en það hefði verið frábært að vinna leikinn. Þetta voru auðvitað vonbrigði í lokin en við getum verið ánægðir með hvernig við spiluðum.  Við getum enn komist upp úr riðlinum."
 
"Við höfum áður verið í þröngri stöðu og haft okkur fram úr þeim. Það er lykilatriði að við glötum ekki trúnni á að við getum komist áfram. Við verðum að halda okkar striki, vinna tvo næstu leiki okkar og sjá hverju það skilar okkur."
 
"Það er svo sem enginn heimsendir þótt við náum ekki að komast upp úr riðlinum. Liðið og knattspyrnufélagið Liverpool halda áfram að vera til."