Mark spáir í spilin

Liverpool vann magnaðan sigur fyrir landsleikjahlé og liðið tekur vonandi upp þráðinn þaðan sem frá var horfið núna á laugardaginn þegar Burnley kemur í heimsókn. Það má segja að það sé alltaf gaman þegar svona "lítil" félög komast upp í deild þeirra bestu. Það er reyndar spurnig um hvernig skilgreina á "stór" og "lítil" félög. Burnley er fornfrægt félag og á sér merka sögu eins og Liverpool og fleiri félög sem teljast "stór". Liverpool er knattspyrnufélag sem er þekkt út um allan heim en það er Burnley ekki. En það má aldrei gleyma því að bera virðingu fyrir öllum íþróttafélögum. Burnley hefur jú lagt Liverpool að velli í úrslitaleik um F.A. bikarinn!

Burnley hefur nú þegar aflað sér vinsælda stuðningsmanna Liverpool með því að leggja bæði Manchester United og Everton að velli. Vinsældir liðsins myndu enn aukast ef Liverpool næði þremur stigum af því. Reyndar er það nauðsynlegt eins og málin standa!

Fróðleiksmolar...

- Liverpool hefur helmingsárangur úr fjórum fyrstu deildarleikjum sínum.

- Þetta er fyrsti leikur liðanna í deildarkeppni frá því á keppnistímabilinu 1975/76. Allt frá því hefur Burnley verið utan efstu deildar.
 
- Liverpool vann síðasta deildarleik liðanna á Anfield Road 2:0.

- Liðin mættust síðast í Burnley í F.A. bikarnum á leiktíðinni 2004/05. Burnley vann þá 1:0 en Liverpool varð svo Evrópumeistari um vorið!

- Fernando Torres hefur nú skorað í þremur leikjum Liverpool í röð.

- Burnley endaði í fimmta sæti í næst efstu deild á síðustu leiktíð en liðið komst upp eftir umspil.

- Burnley hefur unnið allar fjórar atvinnumannadeildinar á Englandi. Aðeins Wolverhampton Wanderes hefur líka gert það.
  

Spá Mark Lawrenson

Liverpool v Burnley

Burnley upplifði hinn mikla styrkleikamun á liðum í útileiknum gegn Chelsea fyrir tveimur vikum. En læri menn þar á bæ af svoleiðis leikjum ætti liðið að geta spjarað sig. Það er frábært fyrir liðin, sem eru nýkomin upp, að spila svona stórleiki en þar innbúðar verða menn að muna að þessir leikir ráða ekki hvort liðið fellur eða ekki.

Liverpool vann útisigur á Bolton í síðustu umferð. Liðið var ekki sannfærandi í þeim leik og þarf á því að halda að vinna góðan sigur. Ég held að liðið muni fá mógu mörg færi í leiknum til að geta unnið slíkan sigur.

Úrskurður: Liverpool v Burnley 3:0.