Mikel San Jose lánaður

Liverpool hefur lánað varnarmanninn Mikel San Jose Dominguez til Spánar. Hann verður í heimalandi sínu á næsta keppnistímabili og mun þar spila með Atletico Bilbao. Lánssamningurinn kveður á um að Atletico geti keypt Mikel, eftir keppnistímabilið, lítist mönnum þar á bæ svo á.

Þetta lán á Mikel kemur nokkuð á óvart því miðverðir Liverpool hafa verið í vandræðum með meiðsli í sumar. Daniel Agger er meiddur og þeir Jamie Carragher og Martin Skrtel rétt náðu að vera leikfærir fyrir fyrsta leik. Þeir meiddust svo báðir í gær. 

Mikel þykir efnilegur miðvörður og stóð sig vel í æfingaleikjunum í sumar. En ætla má að Rafael Benítez telji þá Daniel Ayala og Martin Kelly betri fyrst hann hefur ákveðið að lána Mikel á þessum tímapunkti. Mikel hefur einu sinni komist á varamannabekk aðalliðsins.