Xabi Alonso spilar ekki á morgun

Xabi Alonso getur ekki spilað með Liverpool gegn West Ham United á Upton Park á morgun. Hann er enn ekki búinn að ná sér eftir sparkið sem hann fékk frá Joey Barton í leik Liverpool og Newcastle um síðustu helgi. Fautalegt brot Joey hefur því reynst dýrkeypt. 

Xabi hefur leikið frábærlega á leiktíðinni og skoraði gegn Hull á dögunum, eins og sjá má á myndinni, auk þess að eiga tvö skot í þverslá gegn Newcastle. Það er því slæmt að hafa Xabi ekki til taks. Betri fréttir eru þó af þeim Javier Mascherano, sem meiddist gegn Newcastle, og Fernando Torres sem missti af þeim leik.

Rafael Benítez hafði þetta að segja um þá félaga. "Xabi er ekki leikfær en við gerum okkur kannski vonir um að hann verði klár í næstu viku. Við vorum að vona að hann hefði getað leikið með en þegar upp var staðið gekk það ekki upp. Javier hefur verið að æfa og er í liðinu. Það sama má segja um Fernando."