Gerrard búinn að ná sér

Þær góðu fréttir bárust úr herbúðum félagsins í dag að Steven Gerrard er orðinn góður af meiðslum í nára og getur spilað gegn Newcastle á sunnudaginn.

Rafa Benítez staðfesti þetta í viðtali við opinbera heimasíðu félagsins:  ,,Steven gengur vel og hann er að æfa með hinum í liðinu.  Ég held að hann verði leikfær á sunnudaginn.  Þetta eru góðar fréttir fyrir liðið og hann vegna þess að hann er lykilmaður fyrir okkur í lokaleikjunum."

,,Án Gerrard höfum við engu að síður spilað vel og skorað mörk þannig að það er jákvætt."

Í morgun bárust sögusagnir af því að nokkrir leikmenn félagsins gætu verið á förum í sumar en Benítez bendir á það að allir einblína á það nú að gera atlögu að Manchester United í titilbaráttunni.

,,Ég las blöðin í morgun og þau eru að tala um mismunandi leikmenn," sagði Benítez.  ,,Ég get sagt að í dag erum við ekki að hugsa um að selja neinn.  Það eina sem við hugsum um er að vinna okkar vinnu og reyna að vinna ensku Úrvalsdeildina ef við getum.  Eftir tímabilið er ekki hægt að segja hvað gerist.  En sem stendur erum við augljóslega að undirbúa okkur að vinna okkar leiki."