Agger vill stoppa í götin!

Daniel Agger viðurkennir að varnarleikur Liverpool verði að taka stakkaskiptum ætli liðið sér að vinna Hull á morgun.

Liðið hefur fengið á sig 11 mörk í síðustu fjórum leikjum, sem er hreint ekki það sem stuðningsmenn Liverpool liðsins eiga að venjast, og eftir tvö 4-4 jafntefli í röð, gegn Chelsea og Arsenal, segir Agger að nú sé nóg komið.

,,Við verðum að bæta varnarleikinn. Þegar þú skorar fjögur mörk í leik, þá áttu að vinna! Þetta vitum við vel, en samt sem áður hefur það gerst í tveimur leikjum í röð að við höfum skorað fjögur mörk en einungis uppskorið eitt stig. Það gengur alls ekki."

,,Satt best að segja man ég ekki eftir neinu öðru liði sem hefur spilað tvo 4-4- leiki í röð!", segir Agger vonsvikinn.

,,Við þurfum að sjálfsögðu að hafa trú á því að við getum ennþá unnið deildina, við verðum að halda áfram að berjast. Við þurftum svo sannarlega á öllum stigunum þremur að halda á móti Arsenal, en fengum þau ekki. Þannig er það bara, þá er bara að vinna næsta leik. Við vitum ekki einu sinni hvort við getum útskýrt hvað gerðist í leiknum við Arsenal, en það verður að segjast eins og er að við vorum klaufar."

,,Hjá varnarmönnum er markmiðið alltaf að halda hreinu og þannig átti það líka að vera á þriðjudaginn, en það gekk ekki nógu vel. Þá er ekkert annað í stöðunni en að gera enn betur í leiknum á móti Hull á morgun."