Steven Gerrard ekki með gegn Arsenal

Steven Gerrard mun ekki spila gegn Arsenal næstkomandi þriðjudagskvöld en búist var við því að fyrirliðinn myndi vera klár í þann leik.

Gerrard á við meiðsli á læri að stríða og á æfingu fyrir leikinn við Chelsea í síðustu viku urðu meiðslin örlítið alvarlegri sem þýðir að Gerrard mun vera lengur á sjúkralistanum en upphaflega var talið.

Talsmaður félagsins staðfesti þetta:  ,,Á æfingu fyrir leikinn við Chelsea í Meistaradeildinni urðu meiðsli Steven Gerrard enn verri.  Gerrard fór í skoðun sem staðfesti það sem læknaliðið bjóst við og verður hann frá í viku til tíu daga. Gerrard mun halda áfram að vera í stífri sjúkraþjálfun á Melwood."

Fjarvera Steven Gerrard veikir vissulega liðið en leikmennirnir ættu ekki að óttast fjarveru fyrirliðans því þeir náðu að spila frábærlega gegn Chelsea á Stamford Bridge í fjarveru hans og skora fjögur mörk.